يبدأ الأستاذ ريبال الخضري الجزء الرابع من سلسلة فيديوهات الغناء العربي بمراجعة تعريف الأوكتاف و مصطلحات أخرى مثل الأوكتاف و ربع و غيرها و من ثم ينتقل ليعطي التمرينات و النصائح اللازمة لغناء نوتات الأوكتاف من الأوطى إلى الأعلى بالشكل السليم.
ريبال خضري:
"مرحبا، أنا ريبال من إعزف دوت كوم.
اليوم حنرجع لتمارين الفوكاليز، حنعمل تمرين فوكاليز من التمارين اللي بنسميها مدى واسع، بعد أكتر من كورس بالغنا صار بإمكاننا إن نحنا نقول تمرين على أكتر من أوكتاف و نص، حإرجع أقول شو الأوكتاف و شو الأوكتاف و نص و شو الأوكتاف و ربع و هاي التعاريف كلياتها، الأوكتاف هو أنا لما بيكون عندي النوتات بالسولفيج من الدو للدو المقابله، يعني (يقرأ الأستاذ ريبال التمرين قراءة ايقاعية).
لما أنا بقول عندي تمرين سولفيج على أوكتاف معناتها أنا بيكون عندي أوطى نوته هي بأوكتاف و أعلى نوته هي بأوكتاف، الدرس اليوم اللي حناخده أو تمرين الفوكاليز حيكون بمدى واسع بأوكتاف أو يعني أعلى من أوكتاف أو خلينا نسميها فا سي لي، بالعربي هي فا سي لي من رقم عشره، لإن أنا حكون بدو حروح على مي جواب (يعزف الأستاذ ريبال التمرين)، حقول (يقرأ الأستاذ ريبال التمرين قراءة ايقاعية).
أنا كتير بدي أنتبه إن أنا كل ما عم بطلع لفوق كل ما الشخص اللي عم بيسمعني أو أنا لما عم براقب صوتي لازم أحاول أخلي الصوت بين فوق و بين تحت نفس الإشي، يعني ما بيصير يكون (يقرأ الأستاذ ريبال التمرين قراءة ايقاعية)، لأ، كتير حيكون بشع للشخص اللي عم بيسمعني، فإذاً أنا بإمكاني إني أعمل تمرين بالنمط (يقرأ الأستاذ ريبال التمرين قراءة ايقاعية)، كتير مهم إني أنا إتذكر و أنا عم بغني هادا التمرين إن أول شغله متل ما حكينا، ما لازم يكون في... ما لازم يكون في فرق بين القرار و الجواب و بنفس الوقت أنا لما عم بطلع لفوق أنا بدي أشد معدتي مش بدي أشد حنجرتي يعني مش (يقرأ الأستاذ ريبال التمرين قراءة ايقاعية).
لأ، ما لازم إني أنا أحرك هون، أنا بإمكاني إني أحرك على معدتي بشكل كتير واضح بحيث إني أشدها أكتر لقدام بدل ما إني أشد العضلات... عضلات الرقبه لقدام، هادا الإشي كتير بيوفر علي تعب، يعني (يقرأ الأستاذ ريبال التمرين قراءة ايقاعية)، كإني دفشت شي لقدام بمعدتي و بكون وفرت علي تعب الحنجره (يقرأ الأستاذ ريبال التمرين قراءة ايقاعية)، لأ ما إنسى فتحة تمي (يقرأ الأستاذ ريبال التمرين قراءة ايقاعية)، هلأ بقدر إرجع أنزلها بالسّريع (يقرأ الأستاذ ريبال التمرين قراءة ايقاعية) كمان المده الأخيره اللي أنا بعملها بصوتي بالقرار بتكون كتير عم بتساعد إن ينجذب الصوت للقرار أكتر، ياخد توضع صوت قرار يريح الحنجره بعد تمارين طويله، برجع بقول، الإنتقال دائماً من قرار للجواب بهادا التمرين لازم أركز على كل تفاصيل فتحة التم كل تفاصيل الـ... كل تفاصيل المعده و كمان كل تفاصيل إن أنا دائماً أخلي الصوت لقدام مش لورى."